काठमाडौं–भदौ २१ । व्यवस्थापिका संसदमा सांसदहरुले प्रधानमन्त्री प्रचण्डले भारतीय समकक्षी नरेन्द्र मोदीलाई पठाएको पत्र सार्वजनिक गर्न माग गरेका छन् । सोमबारको बैठकमा विशेष समयमा बोल्दै नेपाल मजदुर किसान पार्टीका सांसद प्रेम सुवालले प्रधानमन्त्री पुष्पकमल दाहाल प्रचण्ड लेण्डुप दोर्जे बन्ने चिन्ता जनतामा रहेकाले भारतीय प्रधानमन्त्री मोदीलाई पठाएको पत्र संसदमा सार्वजनिक गर्न माग गर्नुभयो । सुवालले मोदीलाई पठाइएको पत्रमा समग्र तराई मधेस एक वा दुई प्रदेश बनाएर संविधान संशोधन गर्ने र अंगीकृत नागरिकले पनि राष्ट्रपति लगायतका संवैधानिक पद पाउने आश्वासन दिइएको दावी गर्नुभयो ।
यसअघि एमालेका सांसद हर्कबोल राईले पनि पत्र सार्वजनिक गर्न र त्यसको जवाफ प्रधानमन्त्रीले नै संसदमा दिनुपर्ने माग राख्नुभएको थियो । बैठकमा सत्तारुढ नेपाली कांग्रेसका सांसदले समेत प्रधानमन्त्रीले भारतीय समकक्षी नरेन्द्र मोदीलाई पठाएको पत्र संसदमा सार्वजनिक गर्न माग गरेका छन् ।