काठमाडौं – जेठ । सत्य निरुपण तथा मेलमिलाप आयोगले उजुरी लिन सुरु गरेको पहिलो दिन अर्थात बैशाख ५ गते १ सय २५ वटा उजुरी दर्ता भएका थिए । उजुरी दर्ता सुरु गरेको ५६ दिनपछि अर्थात गत आइतबार एकैदिन ३ हजार ७९ उजुरी दर्ता भए । यो क्रम असार २ गतेसम्म जारी रहनेछ ।
१० बर्षे द्धन्द्धकालका पीडितको उजुरी बुझ्न थालेको सत्य निरुपण तथा मेलमिलाप आयोगमा सोमबारसम्म २८ हजार १ सय १६ वटा उजुरी परेका छन् । सोमबार मात्रै पनि देशभर २ हजार ९ सय ९६ वटा उजुरी दर्ता भएकोमा सबैभन्दा बढी मध्यपश्चिमाञ्चलमा ९ सय ४२ उजुरी परेका थिए । उजुरी दिने समय सकिन लागेकाले अन्तिम समयमा उजुरी गर्नेको संख्या बढेको र यो संख्या अझ बढ्न सक्ने सत्य निरुपण तथा मेलमिलाप आयोगका सदस्य लीला उदासी खनाल बताउनुहुन्छ ।
खनालका अनुसार पीडित वा पीडितका तर्फबाट अन्य जोकोहीले हत्या, अपहरण, अङ्गभङ्ग, शारीरिक वा मानसिक यातना, बलात्कार तथा यौनजन्य हिंसा, व्यक्तिगत वा सार्वजनिक सम्पति लुटपाट, घरजग्गाबाट जर्बजस्ती निकाला र मानवीय कानून विपरितका अपराध सम्बन्धमा उजुरी दिन पाउने व्यवस्था गरिएको छ ।
क्षतिपूर्ती र न्यायको आसा लिएर आयोग पुग्नुभएका काभ्रेका कुशप्रसाद तिमल्सिनाले घर–जग्गा तथा सम्पति कब्जा भएको र ज्यान मार्ने धम्किका कारण विस्तापित भएको पीडा सुनाउदै क्षतीपूर्ती पाउने आशामा आयोग धाएको बताउनुभयो । न्याय र क्षतीपूर्ती माग्न आयोग धाउनेहरुको संख्या निकै बढी देखिदा व्यक्ति किटान गरेर जाहेरी दिने र क्षतीपूर्तीको माग गर्नेहरुको संख्या बढी छ ।
उजुरीमाथि जेठ ५ गतेबाट प्रारम्भिक छानविन थाल्ने र भदौ महिनासम्म छानविन पूरा गर्ने लक्ष्य सहित कामकारबाही अघि बढाइएको आयोगको दाबी छ । पीडित र पीडक दुबैलाई एकै ठाउँ भेला गराएर मेलमिलाप समेत गराउने अख्तियारि पाएको आयोगले माघ २६ गते आफ्नो दुई वर्षे कार्यकाल सकिनुपूर्व नै सरकारलाई प्रतिवेदन बुझाउने बताएको छ । आगोगमा बढेका उजुरीका चाँङले द्धन्द्धको दिगो व्यवस्थापन गर्छ वा समस्या बढाउँछ यसका लागि भने केहि समय पर्खनुपर्ने हुन्छ ।
