काठमाडौं–जेठ २३ । अबैध लागुऔषध ब्राउन सुगरसहित तीन जना पूर्व लडाकु पक्राउ परेका छन् ।
महानगरीय प्रहरी बृत बालाजुको प्रहरी टोलीले काठमाडौंको माछापोखरीबाट अबैध लागूऔषध सहित रुकुम चुनुवाङका जगत पुन, रोल्पा कोटगाउँका अक्तबहादुर घर्तीमगर र रोल्पा गैरीगाउँका प्रवेश डि.सी.लाई पक्राउ गरेको हो । बालाजु बृतका अनुसार अभियुक्तको साथबाट प्रहरीले ६८ ग्राम ब्राउन सुगर बरामद गरेको छ । पक्राउ अभियुक्त मध्ये २८ वर्षीय जगत पुन सेना समायोजनका क्रममा ५ लाख रुपैयाँ बुझेर स्वेच्छिक अवकाश लिएका पूर्वलडाकु हुन । पक्राउ परेका अन्य अभियुक्त समेत सेना समायोजन भन्दा अघि माओवादी छाडेका लडाकु भएको प्रहरी अनुसन्धानबाट खुलेको छ ।
खैरो हेरोइन बिक्री गर्ने उद्देश्यसहित हिँडिरहेको अवस्थामा पक्राउ परेको अभियुक्त उपर लागूऔष सम्बन्धि मुद्धामा म्याद थप गरि आवश्यक कारबाही अघि बढाइएको प्रहरीले जनाएको छ ।
