बार एसोसिएसनको चुनावी तयारी पूरा

काठमाडौ–चैत ११ । कानुन व्यवसायीहरूको छाता संगठन नेपाल बार एसोसिएसनको चुनावको तयारी पूरा भएको छ । एसोसिएसनको निर्वाचन समितिले काठमाडौंमा आज पत्रकार सम्मेलन गरी निवार्चनको  तयारी पूरा भएको जानकारी दिएको हो । आगामी २० गते हुने चुनावका लागि अध्यक्षमा चार, उपाध्यक्षमा दुई, महासचिवमा ६ र कोषाध्यक्षमा चार जना प्रतिष्पर्धी छन् । त्यस्तै, मध्यमाञ्चल उपाध्यक्ष काठमाडौं उपत्यकाका लागि चार, पश्चिमाञ्चल उपाध्यक्षमा तीन र क्षेत्रीय उपाध्यक्षमा दुई–दुई जनाको उम्मेदवारी परेको छ । २५ सिटका लागि ७१ जनाको उम्मेदवारी परेको हो । चुनावमा देशभरबाट ९ हजार ५ सय २२ मतदाता सहभागी हुनेछन् । काठमाडौंमा १ र उपत्यकाबाहिर ३२ गरी ३३ स्थानमा मतदान हुने र सबै मतपेटिका संकलन गरेर मतगणना गरिने भएकाले नतिजाका लागि समय लाग्ने निर्वाचन समितिले जनाएको छ ।